आगळं! वेगळं !!!
Showing posts with label प्रासंगिक. Show all posts
Showing posts with label प्रासंगिक. Show all posts

'नामा' ही जाहला परका





घुमान संमेलनाच्या वेळी
हालत नव्हते
तुमच्या 'नामां'शिवाय 
आमच्या पेपरचे पान

संपन्न झाले संमेलन
विसरलो आम्ही घुमान
आज होता म्हणे तुमचा 
665 वा संजीवन समाधी सोहळा

पण तुमच्या स्मरणांसाठी
रिकामा नव्हता हो
पहिल्या पानावरचा
एकही कोपरा

'राँधे माँ' साठी मात्र
जागा ठेवा बरं का
माध्यमांसाठी आता
'नामा' ही जाहला परका

संत शिरोमणी श्री नामदेव महाराज संजीवन समाधी सोहळा


संत शिरोमणी श्री नामदेव महाराज संजीवन समाधी सोहळा


http://nathtel.blogspot.com/
संत शिरोमणी श्री नामदेव महाराज



नाचू कीर्तनाचे रंगी।
ज्ञानदीप लाऊ जगी।


असा भक्तिचा संदेश देत

भागवत धर्माची पताका

संपूर्ण भारतभर फडकविण्याचे

अलौकिक कार्य करणाऱ्या

संत शिरोमणी श्री नामदेव महाराजांचा

आज संजीवन समाधी सोहळा.

त्यानिमित्त संत शिरोमणी

श्री नामदेव महाराजांचे चरणी विनम्र अभिवादन!




विविध क्लाऊड स्टोअरेज अकाऊंटस् एकत्रित वापरा



तुमचे गुगल ड्राईव्ह, ड्रॉपबॉक्स, वनड्राईव्ह यासारख्या एकापेक्षा अनेक क्लाऊड स्टोअरेज सर्व्हिसेसमध्ये अकाउंटस्  आहेत. आणि ही सगळी अकाऊंटस् स्वतंत्रपणे मॅनेज करताना तुम्हाला बरीच कसरत करावी लागते, त्यामुळे तुमची दमछाक होते. 

कधी कधी तुम्हाला एका क्लाऊड स्टोअरेज मधून दुसऱ्या क्लाऊड स्टोअरेजमध्ये काही फाईल ट्रान्स्फर करण्याची गरज भासते. तेव्हा तुम्हाला त्या त्या अकाऊंटमध्ये स्वतंत्रपणे लॉगीन व्हावे लागते आणि त्यानंतर त्या फाईल्स पीसीवर डाऊनलोड करुन पुन्हा दुसऱ्या क्लाऊड स्टोअरेजमध्ये अपलोड कराव्या लागतात.

या कटकटीमुळे तुम्ही वैतागला आहात. आणि त्यामुळेच या सगळ्या गोष्टी एकदाच लॉगीन होऊन एकाच ठिकाणाहून करता आल्या असत्या तर बरे झाले असते, असा विचार तुमच्या मनात येत असणे साहजिकच आहे.




तुमच्या कल्पनेमधला विचार आता प्रत्यक्षात आला आहे. वेगवेगळ्या क्लाऊड स्टोअरेजमधील फाईल्स आता एकाच ठिकाणाहून मॅनेज करणे शक्य झाले आहे. त्यासाठी मल्टक्लाऊड हा वेबबेस्ड फाईल मॅनेज सर्व्हिस चा पर्याय उपलब्ध झाला आहे. शिवाय तो सुरक्षित,विश्वसनीय व मोफत आहे असा दावा या सर्व्हिस प्रोव्हाडरकडून करण्यात आला आहे.

  • मल्टक्लाऊड काय आहे?

मल्टक्लाऊड ही एक तुमचे विविध क्लाऊड स्टोअरेजवरील सर्व अकाऊंटस एकाच ठिकाणावरुन मॅनेज करणारी वेबबेस्ड सर्व्हिस आहे. सोप्या भाषेत ऑनलाईन क्लाऊड स्टोअरेज मॅनेजर आहे.

  • मल्टक्लाऊड सर्व्हिस सध्या खालील विविध क्लाऊड स्टोअरेजसाठी सपोर्ट करते

Amazon S3, Google Drive, Box, Dropbox, SugarSync, OneDrive, Copy, BaiDu, FTP/SFTP, WebDav, Cubby, CloudMe, WEB.DE, MyDrive, Yandex, HiDrive, Bitcasa

  • विविध क्लाऊड स्टोअरेज मध्ये फाईल ट्रान्सफर

एखादी फाईल पीसीवर डाऊनलोड करुन न घेता, सरळ एका क्लाऊड स्टोअरेजमधून दुसऱ्या क्लाऊड स्टोअरेजमध्ये वळविणे किंवा स्थानांतरीत करणे शक्य झाले आहे. उदा. तुम्ही गुगल ड्राईव्हवरील एखादी फाईल कॉपी करुन सरळ वनड्राईव्ह वर पेस्ट करु शकता.

  • पॉवर ऑफ असतानाही फाईल ट्रान्सफर शक्य

मल्टक्लाऊड background of transmission technology यासारखे टेक्नॉलॉजी वापरते, त्यामुळे पीसी चालू ठेवण्याची गरज नाही. ट्रान्सफर करण्याची फाईल तुम्ही फक्त कॉपी पेस्ट करा, मल्टक्लाऊड सर्व्हर पुढील प्रक्रिया करेल तुमचा पीसी बंद असला तरी देखील.

  • शेड्युल ट्रान्सफर

तुम्हाला काही फाईल्सचा बॅकअप वेळोवेळी आणि नियमीतपणे घेणयाची गरज पडत असेल, तर मल्टक्लाऊड मध्ये शेड्युल ट्रान्सफरचीही सोय आहे. त्यायोगे तुम्ही दैनिक, साप्ताहीक, मासिक किंवा तुमच्या गरजेनुसार हव्या त्या वेळेस आणि नियमीतपणे डाटा ट्रान्सफर करु शकता. आणि ती प्रक्रिया पार पडल्यानंतर तुम्हाला ईमेलने सूचना दिली जाते.

  • क्लाऊड फाईल मॅनेजर

विविध क्लाऊड ड्राईव्हवरील फाईल्स एकत्रितपणे मॅनेज करण्यासाठी क्लाऊड फाईल मॅनेजर उपयुक्त आहे. अपलोड, डाऊनलोड, कट, कॉपी, पेस्ट, मूव्ह, डिलीट, रिनेम, न्यू फोल्डर इत्यादी क्रिया विंडोज एक्सप्लोरर प्रमाणे या फाईल मॅनेजरच्या माध्यामतून पार पाडता येतात.

  • अधिक मोफत जागा 

प्रत्येक क्लाऊड स्टोअरेज सर्व्हिस प्रत्येक अकाऊंटसाठी ठराविक प्रमाणात थोडीशीच मोफत जागा देते. मात्र त्या एकत्रितपणे वापरल्यास भरपूर मोठी जागा मोफत उपलब्ध होऊ शकते. उदा. तुमचे ड्रॉपबॉक्सवर पाच अकाऊंटस असतील तर प्रत्येकी दोन जीबी प्रमाणे दहा जीबी मोफत जागा वापरण्याचा लाभ मल्टक्लाऊडच्या माध्यमातून तुम्हाला घेता येईल.

तेव्हा या मोफत ऑनलाईन क्लाऊड स्टोअरेज मॅनेजर सेवेचा उपयोग करुन पहायला हरकत नाही. मल्टक्लाऊड वेबसाईटच्या होमपेजवर जाण्यासाठी येथे क्लिक करा.

ऑनलाईन शॉपींग आणि साशंक ग्राहक (भाग दोन)


भाग एकवरुन पुढे...

यावरुन वस्तू, सेवा, दर्जा किंवा ऑनलाईन व्यवहारात झालेली फसवणूक याबाबतच्या तक्रारी म्हणजे खरेदी एका वेबस्टोअरवर, तक्रार दुसऱ्या फोरमवर, रिव्ह्यू तिसऱ्या संकेतस्थळांवर असा विस्कळीतपणा दिसून येतो. ग्राहकांच्या तक्रारींचे निराकरण संबंधित वेबस्टोअर्सकडून होत नसल्याचे हे निदर्शक आहे.

आणि अशा प्रकारे ऑनलाईन खरेदीच्या वाईट अनुभवात भरडून निघालेल्या ग्राहकांच्या तक्रारीचे पुढे काय होते, त्यापैकी किती तक्रारींची त्वरित दखल घेतली जाते व त्या ग्राहकांचे समाधान केले जाते. हे इतर खरेदीदारांच्या पुढे कधीच येत नाही. वस्तूंची अस्सलता, दर्जा, सेवा, फसवणूक याबाबत जर ग्राहकांचे समाधान त्या त्या वेबस्टोअर्सकडे वारंवार करुनही केले जात नसेल तर अश्या ग्राहकांना शेवटी ग्राहक मंचाचा आधार घेण्याचा पर्याय उपलब्ध आहे.

पण ग्राहक जर ग्रामीण भागातील अथवा तालुक्याच्या ठिकाणचा रहिवासी असेल तर, त्याला ग्राहक मंचाकडे तक्रार करण्यासाठी, त्यानंतरच्या प्रत्येक तारखांना हजर रहाण्यासाठी जिल्ह्याच्या ठिकाणी हेलपाटे घालणे, आपली बाजू स्वतः मांडता येत नसेल तर वकील नेमणे, याप्रकारे अर्थव्यय व कालापव्यय करणे कितपत परवडणारे व व्यवहार्य आहे हा सुध्दा एक प्रश्नच आहे.

त्यातही छोट्याश्या रकमेच्या वस्तूबाबत ग्राहक मंचाकडे तक्रार म्हणजे चार आण्याची कोंबडी आणि बारा आण्याचा मसाला असा प्रकार होऊ शकतो. त्यामुळे या भानगडीत न पडता, बरेच ग्राहक पैसे अक्कलखाती गेले अशी स्वतःची समजूत घालून गप्प बसणे पंसत करतात. तसे पाहता ऑनलाईन खरेदी व्यवहारासंदर्भातील तक्रारीसाठी ऑनलाईन तक्रारीची सोय व जलद गतीने ऑनलाईन निर्णय मिळण्याची सोय असणे आवश्यक आहे. पण दुर्दैवाने अश्या प्रकारची कुठलीच यंत्रणा आपल्या देशात सध्या अस्तित्वात नाही.

ऑनलाईन शॉपींगमध्ये होत असलेल्या बहुतेक सर्व तक्रारी या वेबस्टोअर्सच्या उदासिनतेमुळे किंवा बेफिकीर वृत्तीमुळे निर्माण होतात असेच एकंदरीत दिसते. त्यांच्यावर नैतिकता सोडून कुठल्याही प्रकारचे बंधन नाही. आणि नैतिकतेचे बंधन तरी किती वेबस्टोअर्स पाळतात ते तक्रारींच्या ओघावरुन दिसून येतेच. आज वेबस्टोअर सुरू करण्याचे प्रत्येकाला स्वातंत्र्य आहे. कुणाच्याही मनात आले की तो ऑनलाईन व्यापारात उतरु शकतो. त्यासाठी कोणतीही बंधने किंवा नियम, विशेषतः ग्राहकहिताची जोपासना करण्यासंदर्भात नाहीत. त्यामुळे ऑनलाईन खरेदी करताना ग्राहकांच्या मनात असुरक्षिततेची भावना असणे साहजिकच आहे. ग्राहकांच्या मनातील ही भावना दूर होण्यासाठी, दूरसंचार क्षेत्रात कार्यरत असणाऱ्या ट्रायसारख्या संस्थेप्रमाणे एक नियंत्रक संस्था ई-कॉमर्स क्षेत्रासाठी सुरू होण्याची आता खरी गरज आहे.

ई-कॉमर्स क्षेत्रात सध्या अस्तित्वात असलेल्या व नव्याने सुरू होणाऱ्या सर्व संस्थांना या नियंत्रक संस्थेकडे नोंदणी करणे सक्तीचे असेल. अनोंदीत संस्थांना व्यवहार करता येणार नाहीत. या नियंत्रक संस्थेकडून कंपन्यांना नोंदणी प्रमाणपत्र दिले जाईल. ते त्यांना त्यांच्या वेबस्टोअरवर प्रदर्शित करणे बंधनकारक असेल. ऑनलाईन खरेदी करणाऱ्या प्रत्येक ग्राहकांवरही, त्याने केलेल्या प्रत्येक व्यवहाराबाबत वेबस्टोअरबद्दलचे मत मानांकन स्वरुपात या नियंत्रक संस्थेकडे नोंदवावे लागेल. तशी सोय त्या त्या वेबस्टोअरने ग्राहकांना त्यांच्या वेबस्टोअरवरच ग्राहकांना उपलब्ध करुन देणे बंधनकारक असेल. ग्राहकांनी दिलेल्या मानांकनाच्या आधारे व त्याचसोबत इतर ठरविलेल्या निकषांच्या आधारे ही नियंत्रक संस्था सर्व वेबस्टोअर्सना मानांकन प्रदान करेल. नोंदणी क्रमांकामुळे व मानांकनामुळे ग्राहकांना खरेदीपूर्वीच त्या वेबस्टोअरची विश्वासार्हता, गुणवत्ता कोणत्या श्रेणीची आहे याची कल्पना येईल. त्यामुळे कुठल्या वेबस्टोअरवर खरेदी करायची याचा निर्णय घेणे ग्राहकाला सोपे जाईल.

त्याचबरोबर ग्राहकांच्या तक्रारींचे समाधान संबंधित वेबस्टोअरकडून झाले नाही तर, त्या ग्राहकाला या नियंत्रक संस्थेकडे ऑनलाईन तक्रार करुन त्वरित न्याय मिळविण्याचा अधिकार असेल. आणि जर या नियंत्रक संस्थेमार्फत ग्राहकांना न्याय मिळविण्याची वेळ आली, तर त्या वेबस्टोअरचे मानांकनही घटविले जाऊ शकेल. तसेच एखाद्या वेबस्टोअरबद्दल वारंवार तक्रारी येत असतील तर नियंत्रक संस्थेच्या तरतुदीनुसार त्या वेबस्टोअरला दंड भरण्याच्या, तसेच प्रसंगानुसार परवाना निलंबीत किंवा रद्द केला जाण्याच्या कारवाईलासुध्दा सामोरे जावे लागेल.

अशी यंत्रणा निर्माण झाल्यास अस्सल वस्तू, उत्कृष्ट दर्जा, किफायतशीर दर, जलद व विनयशील सेवा ग्राहकांना पुरविण्याची जबाबदारी आपणावर आहे याची खरी जाणीव वेबस्टोअर्सना होईल. तसेच त्यांना मिळणारे मानांकनही यावरच अवलंबून असल्यामुळे त्यांना आपले मानांकन टिकविणे व वाढविणे यासाठी विशेष प्रयत्न करणे भाग पडेल.

या नियंत्रक संस्थेमुळे ग्राहकांनाही एक प्रकारचे सुरक्षा कवच प्राप्त होईल. ऑनलाईन खरेदीत आता आपली फसवणूक होणार नाही याची त्यांना खात्री पटेल. आणि त्यामुळे त्यांना निर्भयपणे मुक्तपणे ऑनलाईन खरेदीचा आनंद घेता येईल. त्यामुळे ई-कॉमर्स क्षेत्र अश्या नियंत्रक संस्थेच्या नियंत्रणाखाली आणले जावे यासाठी, ग्राहकांचे हित जोपासण्यसाठी प्रयत्नशील असणाऱ्या सर्व संस्था, राजकारणी मंडळी आणि ग्राहक अश्या सर्वांच्याच सामूहिक प्रयत्नांची गरज आहे. आणि त्याला प्रबळ इच्छाशक्तीची जोड असल्यास ते अशक्यही नाही.

§ § §

ऑनलाईन शॉपींग आणि साशंक ग्राहक (भाग एक)


ई-कॉमर्स संदर्भात प्रसिध्द झालेल्या एका आकडेवारीनुसार भारतात चौदा कोटी इंटरनेट वापरकर्ते आहेत, 2014 मध्ये ऑनलाईन खरेदीदारांची संख्या चार कोटीवरुन साडेसहा कोटीवर गेली आहे. ई-बे इंडिया प्रत्येक मिनीटाला सहा वस्तूंची विक्री करते, तर फ्लिपकार्ट वीस वस्तूंची विक्री करते.

ई-कॉमर्सचा प्रसार भारतीय बाजारपेठेत किती झपाट्याने होत आहे, याची कल्पना वरील उदाहरणादाखल दिलेल्या आकडेवारीवरुन यावी. ऑनलाईन शॉपींगच्या माध्यमातून ग्राहकांना मनपसंत खरेदी करता येईल अश्या भरपूर ब्रँडसच्या व्हरायटीने खच्चून भरलेली अनेक वेबस्टोअर्स सुरू झालेली आहेत. मोबाईलच्या माध्यमातून इंटरनेटचे जाळे सर्वदूर अगदी ग्रामीण भागातसुध्दा पसरल्यामुळे, देशातील कुठल्याही गांवातून कोणत्याही ग्राहकांस मनपसंत वस्तू घरबसल्या विकत घेण्याची सोय यामुळे झालेली आहे.

त्यामुळे देशातील एखाद्या ग्रामीण भागातील ग्राहकाला हव्या असलेल्या ब्रँडचे आणि नेमके जे पाहिजे तेच मॉडेल स्थानिक बाजारपेठेत जरी मिळाले नाही, तरी ते या ऑनलाईन शॉपींगच्या माध्यमातून खरेदी करणे आता सहज शक्य झाले आहे.

मात्र ई-कॉमर्सची ही गगनचुंबी इमारत, ऑनलाईन विक्री करणारी वेबस्टोअर्स आणि ऑनलाईन खरेदी करणारे ग्राहक यांच्याती परस्परांवर असलेल्या विश्वासाच्या भक्कम पायावर आधारलेली आहे, ही गोष्ट विसरून चालणार नाही. अशातच अलिकडेच फ्लिपकार्ट, स्नॅपडील यासारख्या नावाजलेल्या कंपन्यांकडून मोबाईल खरेदी केला आणि वीटेचा तुकडा मिळाला, लाकडाचा तुकडा मिळाला, चौऱ्याऐंशी हजाराचे मॅकबुक मागविले आणि सहाशे रुपयांचा हीटर फॅन मिळाला या प्रकारच्या, ग्राहकांची फसवणूक झाल्याच्या येत असलेल्या बातम्या, या वेबस्टोअर्सच्या विश्वासार्हतेवर प्रश्नचिन्ह निर्माण करणाऱ्या आहेत. त्यामुळे विश्वासाचा हा भक्कम पाया ठिसूळ तर होत नाही ना? अशी शंका ग्राहकांच्या मनात डोकावायला लागली आहे. एकीकडे ऑनलाईन शॉपींगची लोकप्रियता भारतीयांमध्ये वाढत असतानाच, दुसरीकडे येऊ लागलेल्या अश्या बातम्यांमुळे, ऑनलाईन ग्राहकांचा साशंक मनःस्थितीत आणि सावधपणे खरेदी करण्याकडे कल दिसतो.

फसवणूक झालेली व माध्यमातून समोर आलेली ही काही अगदीच मोजकी उदाहरणे आहेत. पण फसवणूक झालेला प्रत्येक ग्राहक माध्यमासमोर येईलच असे नाही, त्यामुळे याप्रकारे फसवणूक झालेली अशी अनेक उदाहरणे असण्याची शक्यता नाकारता येणार नाही.

खरेदी केलेल्या वस्तूऐवजी लाकूड, वीटांचे तुकडे मिळणे अशा फसवणूकीसोबतच, वस्तू मिळाली पण तिचा दर्जा खराब होता, जी मिळाली ती दुय्यम दर्जाची मिळाली किंवा अस्सल दर्जाची मिळाली नाही, ती लगेचच बिघडली, नादुरूस्त अवस्थेत मिळाली किंवा मागविली एक मिळाली दुसरीच अश्या प्रकारच्याही अनेक तक्रारी वेगवेगळ्या वेबस्टोअर्सवर पिडीत ग्राहकांनी आपल्या प्रतिक्रियेतून मांडलेल्या दिसून येतात.

याचसोबत सेवेच्या दर्जाबाबत सुध्दा तक्रारी दिसून येतात. उदा. आधी ऑनलाईन पेमेंट करुनही वस्तू उशिरा पाठविली जाणे, नादुरूस्त वस्तू बदलून देण्याबाबत टाळाटाळ करणे, तक्रारींना उत्तरे लवकर न देणे, तक्रारीबाबत फोनवर बोलण्यास टाळाटाळ करणे इ. सुमार दर्जाच्या वाईट सेवेचा आलेला अनुभवसुध्दा ग्राहकांनी प्रतिक्रियेमधू तळमळीने मांडलेला दिसतो.

पण याठिकाणी तक्रार करुन, नकारात्मक प्रतिक्रिया देऊनही काही उपयोग होत नाही असे लक्षात आल्यावर काही ग्राहक इतर कंझ्युमर फोरमवर याबाबत आवाज उठविण्याचा प्रयत्न करताना दिसतात, तर रिव्ह्यूसाठी चालविण्यात येणाऱ्या माऊथशट डॉट कॉम यासारख्या संकेतस्थळांवरही काही ग्राहक आपला अनुभव लिहून इतरांना सावध करण्याचा प्रयत्न करताना दिसून येतात.


उर्वरीत लेख दुसऱ्या भागात...

इंग्लिश शिकण्यासाठी एक मस्त अॅप


अँड्रॉईड फोनचा उपयोग प्रत्येक जण आपापल्या आवडीनुसार करत असतो. कुणाला गेम खेळण्यात मजा वाटते, तर कुणी संगीत ऐकण्याचा आनंद घेतात, तर काही जण सतत इंटरनेटशी कनेक्ट रहाणे पसंत करतात. पण मनोरंजनासोबतच या फोनचा उपयोग शिक्षणासाठी कसा करुन घेता येईल? असा विचार किती लोकांच्या मनात येत असेल?
शिक्षणाचे नांव ऐकताच पडल्या ना तुमच्या कपाळावर आठ्या? नक्कीच पडल्या असणार. आणि ते ही साहजिकच आहे म्हणा. कारण अभ्यासापासून सुटका पाहिजे म्हणून तर फोन हातात घेतलाय, आणि आता पुन्हा इथेही शिक्षणच? काय कटकट आहे, असाच काहीसा विचार तुमच्या मनात आला असणार. पण मी सांगतो ते इंग्रजी शिकण्यासाठी असलेले एक भन्नाट अॅप तुम्ही तुमच्या फोनवर डाऊनलोड करुन घ्या. आणि बघा मग शिक्षणासोबतच मनोरंजनाचा ही अनुभव तुम्हाला आल्याशिवाय रहाणार नाही.
सध्या गुगल प्ले स्टोअरवर उपलब्ध असलेली एखादे पुस्तक वाचत असल्याप्रमाणे इंग्रजी शिक्षणाचा कोर्स डिझाईन केलेली, बरीच रटाळ आणि कंटाळवाणी अॅप्स तुम्ही पाहिली असतील. आणि त्यामुळेच नको ते इंग्रजी शिक्षण अशी तुमची मानसिकता झाली असेल.
पण मी येथे तुम्हाला जे अॅप सांगणार आहे, ते तुम्ही पाहिलेल्या सर्व अॅप्सपेक्षा वेगळं आहे. याचा इंटरफेस अतिशय वेगळा आहे. इंग्रजी ऐकणे, बोलणे, लिहणे आणि वाचणे अशा चारही पध्दतीने हिंदी भाषेतून इंग्रजी शिकण्याचा हा एक विनामूल्य कोर्स आहे. आणि या कोर्सची भाषा हिंदी असल्यामुळे मराठी भाषिकांना हा इंग्रजी शिकण्याचा कोर्स आपल्या मातृभाषेतून शिकण्याइतकाच सोपा आणि जवळचा वाटेल.
हा कोर्स इंटरॅक्टीव्ह पध्दतीने डिझाईन केलेला आहे. शिकणाऱ्याला यात प्रत्यक्ष सहभागी करुन घेत, गंमतीदारपणे, खेळकर पध्दतीने यातील लेसन्स असे पुढे जात रहातात की, शिकणारांना मजा तर येतेच शिवाय ज्ञानही मिळत जाते. शिवाय तुम्ही दिलेल्या उत्तरांचे रिझल्टही येथे ताबडतोब मिळत जातात. आणि अचूक उत्तरांना गुणांऐवजी कॉईन्स दिले जातात. या कॉईन्सचा उपयोग या कोर्समध्ये पुढे काही लेसन्स लॉक्ड आहेत, ते अनलॉक करण्यासाठी करता येतो. आणि आवश्यकतेनुसार कमी असणारी कॉईन्स तुम्हाला मित्रांकडून घेता येतात किंवा त्यांना देता ही येतात.
या कोर्समध्ये सुमारे शंभराहून अधिक लेसन्स आहेत. हा सगळा कोर्स मनोरंजक पध्दतीने शिकत असताना, आवश्यक त्या ठिकाणी उपयुक्त अशा व्याकरणाबाबतच्या टिप्सही प्रदर्शित होत रहातात. या कोर्स मध्ये शब्दसंग्रह देखील आहे. तसेच या कोर्समध्ये मनोरंजनात्मक आणि ज्ञानवर्धक गेम्ससुध्दा समाविष्ट केलेल्या आहेत.
या अॅपचे आणखी वेगळं वैशिष्ट्य म्हणजे यात दिलेली हेल्पलाईन. ही एक व्हॉटसअप प्रमाणे चॅटींगची सुविधा असलेली हेल्पलाईन आहे. इंग्लिश शिकत असताना तुम्हाला येणाऱ्या काही शंका, अडचणीबाबत तज्ञांसोबत या हेल्पलाईनद्वारे ऑनलाईन संवाद साधून शंका समाधान करून घेता येण्याची सोय आहे. विशेष म्हणजे हा संपूर्ण कोर्स ऑफलाईन आहे. फक्त हेल्पलाईनचा उपयोग करण्याव्यतिरीक्त इंटरनेट सुरु असण्याची आवश्यकता नाही.
हे अॅप परिवारातील लहान मुलांपासून थोरांपर्यंत सर्वांना, तसेच इंग्रजी शिकण्याची नव्याने सुरुवात करणाऱ्यांपासून ते इंग्रजी येत असणाऱ्यांपर्यंत सर्वांनाच उपयुक्त ठरेल यात शंका नाही.
तुम्हालासुध्दा हे अॅप नक्कीच आवडेल, आणि याचा वापर केल्यानंतर तुम्ही इतरांना सुध्दा याची शिफारस कराल अशी खात्री वाटते. आणि तुम्ही जर तुमच्या परिचितांना व्हॉटसअप अथवा ईमेलने याची शिफारस केली, आणि तुम्ही पाठविलेल्या लिंकवरुन जर कुणी हे अॅप डाऊनलोड करुन, त्याचा वापर सुरू केला तर त्या जॉईनींगचे आणखी चारशे कॉईन्स तुमच्या खात्यावर जमा होतील. आहे की नाही, आम के आम, और गुठली के दाम.
अॅप डाऊनलोड करुन घेण्यासाठी खाली दिलेला QR Code  तुमच्या अँड्रॉईड फोनवर स्कॅन करा, आणि डाऊनलोड करुन घ्या.








किंवा खालील लिंक वेब ब्राऊजरच्या अॅड्रेसबारमध्ये टाईप करा.
http://goo.gl/sjvUt0

अपडेट : या अॅपच्या निर्मात्यांनी, या अॅपच्या लेटेस्ट व्हर्जनमध्ये हिंदी भाषेसोबत मराठी भाषेचा पर्यायही माध्यम म्हणून उपलब्ध करुन दिला आहे. त्यामुळे मराठी भाषाप्रेमी लोकांना इंग्रजी आपल्या मातृभाषेतून शिकणे आता सहज शक्य झाले आहे.

ज्यांनी हे अॅप यापूर्वीच डाऊनलोड केलेले आहे, त्यांनी ते अपडेट करुन घ्यावे म्हणजे त्यांना मराठी भाषेचा पर्याय निवडीसाठी उपलब्ध होईल.
§ § §

गुगल अॅडसेन्स आता हिंदी भाषेसाठीही



गुगल अॅडसेन्समध्ये आता हिंदी भाषेसाठी अच्छे दिन आ गये है असं म्हणायला हरकत नाही. हिंदी भाषेतून ब्लॉग लिहणाऱ्या ब्लॉगर्सनी केलेल्या प्रयत्नांना (जर त्यांनी काही प्रयत्न केले असतील तर, कारण त्यांनी काय प्रयत्न केले, कधी केले, कुठे केले याबाबत माहिती उपलब्ध नाही) यश आले आणि गुगल अॅडसेन्स आता हिंदी भाषेसाठी उपलब्ध झाले आहे. गुगल लँग्वेज सपोर्ट या लिंकवर हिंदी भाषेचा समावेश केलेला पाहता येईल. 

आत्तापर्यंत जे हिंदी भाषिक ब्लॉगर्स पदरमोड करुन ब्लॉग लिहीत होते, किंवा त्यांना त्यासाठी उत्पन्नाचा स्त्रोत उपलब्ध नव्हता, त्यांना आता ही एक चांगली संधी उत्पन्न झाली आहे. 

पण यामुळे एक झाले की, आता हिंदी भाषिक ब्लॉगर्सना ब्लॉगद्वारे गुगल अॅडसेन्सच्या माध्यमातून अर्थार्जन करण्यासाठी अधिक परिश्रम घेऊन चांगले लिखाण करावे लागेल आणि त्याचसोबत ब्लॉगच्या ट्रॅफिकवरही लक्ष ठेवावे लागेल.  आता सर्वप्रथम कोणत्या हिंदी ब्लॉगला गुगल अॅडसेन्सच्या जाहिराती दाखविण्याचा मान मिळणार आहे हे पाहणे औत्सुक्याचे ठरेल. 

हिंदी भाषिक ब्लॉगर्सना याबद्दल शुभेच्छा देतानाच, मराठी भाषिक ब्लॉगर्सच्या मनात गुगल अॅडसेन्समध्ये आपल्या मराठीला अच्छे दिन कधी येतील असा विचार नक्कीच येत असेल.

व्हॉटसअॅप ग्रुपमधे पोस्ट केलेला मेसेज कोणी कोणी वाचला?



व्हॉटसअॅप वापरणारे जवळपास सर्वजण आपापल्या आवडीनुसार कोणत्या ना कोणत्या ग्रुपचे सदस्य असतात. आणि ते ग्रुपमधे आपलेही मेसेज पोस्ट करत असतात, पण त्यांनी पोस्ट केलेले मेसेज ग्रुपमधे कोणी वाचले की नाही हे मात्र समजत नाही.

पण आता व्हॉटसअॅप ग्रुपमधे तुम्ही जेव्हा काही मेसेज पाठवाल तेव्हा तो कोणी कोणी वाचला याची माहिती तुम्हाला मिळू शकेल. 

त्यासाठी तुम्ही ग्रुपमधे पाठविलेल्या मेसेजवर टच करुन तो मेसेज थोडासा दाबून ठेवा, त्यानंतर तुम्हाला स्क्रीनवरील पट्टीमधे i चे चिन्ह दिसेल त्यावर टच करताच तुमचा मेसेज कोणाकोणाला डिलीव्हर झाला आहे (Deliverd to), आणि तो कोणी कोणी वाचला आहे (Seen by) त्याचा तपशील दिसेल. 

त्याचबरोबर त्यामधील (Seen by) मधील कॉन्टॅक्टवर टच करुन Delivered व  Read चा टाईमसुध्दा तुम्ही पाहू शकाल.

लाल दिव्यांची स्वप्ने



होय नाहीच्या गोंधळात
उरकला आहे एक टप्पा
चर्चेपुरत्याच उरल्या आहेत
आता नैतिकतेच्या गप्पा

इकडे सगळ्या चॅनेल्सवर
चर्चेवर चर्चा घडत आहेत
तिकडे मात्र प्रत्येकाला लाल
दिव्यांची स्वप्ने पडत आहेत

मराठी सचिनचे इंग्रजी आत्मकथन



सचिनच्या प्लेईंग इट माय वे या आत्मकथनाच्या इंग्रजी पुस्तकाचे काही भारतीय भाषांसोबत मराठीतही भाषांतर प्रकाशित करण्याचा निर्णय प्रकाशकांनी घेतला आहे.

एका दृष्टीने मराठी भाषिकांवर हा एक प्रकारे उपकारच झाला म्हणायचा. मराठी मातीत जन्मलेल्या, माय मराठी भाषा बोलत मोठा झालेल्या सचिनला आपले आत्मकथन लिहायला इंग्रजीचा आधार घेण्याची गरज का पडावी? विचार, आचार, बोलणे मराठीत पण आत्मकथन इंग्रजीत! इंग्रजी भाषेविषयी केवढं प्रेम!

ज्या महाराष्ट्रात तो वाढला, ज्या महाराष्ट्रात मराठी भाषेची अस्मिता जपण्यासाठी आंदोलने होतात, दुकानाच्या पाट्या इंग्रजीत लिहल्या तर त्यावर दगडफेक होते, त्या महाराष्ट्रात रहाणाऱ्या सचिनला आत्मकथन लिहताना मराठी भाषेचा विसर पडावा ही दुर्दैवाची गोष्ट आहे.

मराठी माणसांनी मोठे केलेला, मराठी क्रिकेटपटू म्हणून महाराष्ट्रातल्या लोकांनी डोक्यावर घेतलेला तो सेलिब्रेटी. त्याच्या या मराठी भाषेच्या दुराव्याविषयी त्याच्याविरोधात कोण बोलणार? कोण आंदोलन करणार? आणि ते होणारही नाही, कारण आंदोलनात, निदर्शनात केवळ सर्वसामान्यांना टार्गेट केले जाते, सचिनसारख्या सेलिब्रेटींना नाही, हे वेगळे सांगण्याची गरज नाही.

मराठी माणसाला अभिमान वाटेल अश्या सचिनसारख्या सेलिब्रेटीकडून मराठी भाषेची केली गेलेली ही उपेक्षा, मराठी भाषेवर प्रेम करणाऱ्यांना निश्चितच अपेक्षित नसणारी अशी आहे.

त्याचे आत्मकथन सर्वप्रथम मराठी भाषेत प्रसिध्द होऊन, नंतर त्याचे इतर भारतीय व परकीय भाषेत अनुवाद प्रसिध्द झाले असते तर मराठी माणसांना त्याचा अधिक अभिमान वाटला असता.

सचिनवर प्रेम करणारा क्रिकेटप्रेमी रसिक समाजाच्या विविध स्तरात आहे. सचिनच्या प्रत्येक गोष्टीचे कौतुक त्यांना असणे अगदी स्वाभाविक आहे. त्यामुळे सचिनने आत्मकथन लिहलयं म्हणल्यावर ते वाचण्याची इच्छा त्याच्या मराठी भाषिक चाहत्यांनाही झाली असणार, पण इंग्रजी भाषेच्या अडचणीमुळे त्यांचा हिरमोडही नक्कीच झाला असणार.

पण त्यांचा विचार सचिनने पुस्तक लिहताना केलेलाच नाही, चाहत्यांचाही नाही अन् मायमराठीचाही नाही. कोणता वाचकवर्ग डोळ्यासमोर ठेवून त्याने पुस्तक लिहले हे त्यालाच ठाऊक. शेवटी प्रकाशकांनाच मराठी माणसांची दया आली असावी (त्यांचा धंदा होणार हा भाग वेगळा), आता त्यांनी ही अडचण दूर करण्याचे ठरविले आहे.

आणि त्यामुळेच आता मराठी मनाचा मानबिंदू असलेल्या मराठी भाषिक सचिनने इंग्रजीतून लिहलेले आत्मकथन आता अनुवादित करुन पुन्हा मराठीत आणले जाणार आहेत. सचिनसारख्या मराठी माणसाने इंग्रजीतून हे पुस्तक लिहल्यामुळे करावा लागत असलेला हा महाद्रविडी प्राणायम! मराठी सेलिब्रेटींचे मराठी भाषेविषयीचे प्रेम किती हे यातून स्पष्ट व्हायला हरकत नाही.


एमआयएम पक्षावर बंदी घालावी का?


ओवेसीच्या एमआयएम पक्षावर बंदी घालावी का? ही मागणी सध्या मिडीयातून चर्चेत आहे. चिथावणीखोर, प्रक्षोभक व जातीयवाद भडकवणारी भाषणे ही या पक्ष्याची ओळख आहे. असे असूनही, या पक्षावर कडक कारवाई करण्याविषयीचे ठोस धोरण आजवर काँग्रेस व राष्ट्रवादी काँग्रेसने न स्विकारल्यामुळे, त्यांनीच अप्रत्यक्षपणे या पक्षाला खतपाणी घातल्याचे स्पष्ट होते. एमआयएमच्या भाषणामुळे मुस्लीम मते हिंदुत्ववादी पक्षांना मिळण्याऐवजी आपल्याला मिळतील असा हेतू त्यामागे असावा. पण तो हेतू सफल न होता, मुस्लीम मतदार काँग्रेस व राष्ट्रवादी काँग्रेस पक्षापासून दूरावला गेला, आणि त्यांची पारंपारिक मतेही थेट एमआयएम पक्षाकडे गेली.

त्यामुळे काँग्रेस व राष्ट्रवादी काँग्रेसला आता तो पक्ष जातियवादी आहे याचा साक्षात्कार झाला, आणि त्यातून ही मागणी पुढे आली असावी. राज ठाकरे, प्रवीण तोगडीया यांच्यासारख्या नेत्यांना प्रवेशबंदी, भाषणबंदी किंवा काय भाषण करावे व करु नये याविषयी बंधने घातली जातात हे आपण आजपर्यंत पहात आहोत, मात्र ओवेसींना यासारखे कायदे नियम लागू केले जात नाहीत. मुस्लीमांचे लांगूलचालन म्हणजे धर्मनिरपेक्षता अशी काँग्रेस व राष्ट्रवादी काँग्रेसच्या मते धर्मनिरपेक्षतेची व्याख्या असावी.

याचसोबत हिंदूत्ववादी संघटनाही डावपेचात कमी पडत आहेत असे दिसते. याचे कारण असे की, राज ठाकरे, प्रविण तोगडीया इत्यादी नेत्यांवर देशाच्या विविध प्रांतात स्थानिक पोलीस स्टेशनमध्ये, कोर्टामध्ये तक्रारी, गुन्हे, दावे दाखल केले जातात त्यामागे पध्दतशीरपणे डावपेच आखले गेलेले असतात. देशाच्या विविध भागात कोर्टकचेऱ्यांच्या चकरा मारुन या नेत्यांना कसे जेरीस आणता येईल हा हेतू त्यामागे असतो. असे डावपेच आखण्याच्या कौशल्यचा अभाव हिंदूत्ववादी संघटनामध्ये दिसून येतो.

निवडणूका म्हणजे ...



निवडणूका म्हणजे ...



पक्षात सन्मानाने वागविले
जात नसल्याचा अचानकपणे
साक्षात्कार होण्याचा,
निवडणूकांची संधी साधत
पक्षांतर करण्याचा काळ

विरोधकांनी दिशाभूल केली
हे पटवून देण्याचा प्रयत्न
करत विकासाच्या आठवणीने
गळे काढण्याचा काळ

एकाला हात, तर दुसऱ्याला
लाथ देत गरळ ओकण्याचा,
मुखवटे फाडण्याचा काळ

आपण कधी काळी केलेली
कोणतीतरी कामे आठवून
आठवून सांगण्याचा काळ

पूर्तता करण्याची बंधने
नसलेल्या आश्वासनांची खैरात
जाहिरनाम्यातून करण्याचा काळ

पदयात्रेतून उसने हसू चेहऱ्यावर आणत
नको तिथे पायी चालण्याचा,
ज्यांच्याकडे वाहनांच्या काचेतूनही
बघायला कधीच सवड नाही
अशांचे पाय धरण्याचा काळ

मतांसाठी अपमान गिळण्याचा,
स्वाभिमान गहाण टाकण्याचा,
लाचारी पत्करण्याचा काळ

शत्रूत्व, मित्रत्व आणि
आत्मसन्मानांच्या व्याख्या
बदलण्याचा काळ

कार्यकर्ते, मिडीया, ज्योतिषी,
सर्वेक्षण संस्थांच्या तेजीचा,
सट्टेबाजांच्या चिंतेचा, म्हणजेच
कुणाचा धंदा, तर कुणाचा
वांधा होण्याचा काळ

आणि फक्त मतदान केंद्रात
जाईपर्यंतच मतदार राजाचा
मान मिळण्याचा काळ