आगळं! वेगळं !!!

निवडणूका म्हणजे ...



निवडणूका म्हणजे ...



पक्षात सन्मानाने वागविले
जात नसल्याचा अचानकपणे
साक्षात्कार होण्याचा,
निवडणूकांची संधी साधत
पक्षांतर करण्याचा काळ

विरोधकांनी दिशाभूल केली
हे पटवून देण्याचा प्रयत्न
करत विकासाच्या आठवणीने
गळे काढण्याचा काळ

एकाला हात, तर दुसऱ्याला
लाथ देत गरळ ओकण्याचा,
मुखवटे फाडण्याचा काळ

आपण कधी काळी केलेली
कोणतीतरी कामे आठवून
आठवून सांगण्याचा काळ

पूर्तता करण्याची बंधने
नसलेल्या आश्वासनांची खैरात
जाहिरनाम्यातून करण्याचा काळ

पदयात्रेतून उसने हसू चेहऱ्यावर आणत
नको तिथे पायी चालण्याचा,
ज्यांच्याकडे वाहनांच्या काचेतूनही
बघायला कधीच सवड नाही
अशांचे पाय धरण्याचा काळ

मतांसाठी अपमान गिळण्याचा,
स्वाभिमान गहाण टाकण्याचा,
लाचारी पत्करण्याचा काळ

शत्रूत्व, मित्रत्व आणि
आत्मसन्मानांच्या व्याख्या
बदलण्याचा काळ

कार्यकर्ते, मिडीया, ज्योतिषी,
सर्वेक्षण संस्थांच्या तेजीचा,
सट्टेबाजांच्या चिंतेचा, म्हणजेच
कुणाचा धंदा, तर कुणाचा
वांधा होण्याचा काळ

आणि फक्त मतदान केंद्रात
जाईपर्यंतच मतदार राजाचा
मान मिळण्याचा काळ

हा महाराष्ट्र माझा!

=> युती तोडणाऱ्यांना भांडी घासायला लाऊ -संजय राऊत

  • म्हणजे पुन्हा भांड्याला भांडे लागणारच

=> मोदींनी केंद्राचे पहावे, महाराष्ट्राचे आम्ही बघून घेऊ -राज ठाकरे

  • आम्ही एकदा वाटणी केली म्हणजे केली, मतदार मंडळी तेल लावीत गेली

=> फक्त खर्च वाढला, सिंचन झालेच नाही -पृथ्वीराज चव्हाण

  • खर्चात पुढे आहे, हा महाराष्ट्र माझा!

=> रिकामे जहाज जास्तच गोंगाट करते, सोनिया गांधींची मोंदीवर टीका

  • टीका की काँग्रेसच्या जहाजाची तक्रार?

व्हॉटॅन आयड्या सर्जी!


स्थळ : बारमधला एक निवांत कोपरा
वेळ : निवडणूकीतल्या रात्रीची
चार-पाच विविध पक्षांचे कार्यकर्ते बारमध्ये एकाच टेबलवर बसून घोटासह चकण्याचा मजा घेत गप्पा मारण्यात मग्न.
पहिला : काय बी म्हना राव, पन ह्या येळला आपलं तर डोस्कचं चालना झालयं.
दुसरा : कशामुळं?
तिसरा : आरं कशामुळं म्हून काय इच्यारतोय, कोन्ता पुडारी कुटं हाय तेच कळना झालय.
चौथा :  खराय, काल हिकडं, आज तिकडं, तुम्चा आम्च्याकडं आन आम्चा तुमच्याकडं आस्लचं चाललय.
पहिला : म्हागच्या ईलेक्षनला ज्याच्या इरुध्द परचार केला, आता त्याज्याच बाजून करायची पाळी आलीय
दुसरा : आन त्या पुडाऱ्यांन्ला बी गोंदळल्या सारकं व्हत आसल, म्हंजी उगं पळत्या लोकलचा डबा पकडून गर्दीत घुसल्यासारकं वाटत आसल. जितं गेलेत तितल्या कुनाचीबी वळक ना पाळक.
तिसरा : म्हंजी मान ना मान मै तेरा म्हेमान म्हना की.
चौथा : बरोबर बोल्लात राव, आस्लं इनकमिंग चाल्लयं की आपन येकाद्याला मोबाईलवर इच्यारतो का न्हाई तुमी कुटं हैत म्हनून , तसं आता या उड्या टाकू पुडाऱ्यांन्ला तुमी आत्ता कुटं हैत आसं इच्यारायची पाळी आलीय.
पहिला : ह्या पुडाऱ्यांचं कसबी चालतय, पन आप्ल्यासारक्या कार्यकर्त्यांचं काय
दुसरा : आपन हैतच सतरंज्या उचलायला
तिसरा : हं आत्ता लक्ष्यात आलं, तरीच मी ईच्यार करतं हुतो की, आमचं रौल जी न्हेमीच तरुनांनी राजकार्नात यावं म्हनून आवतनं देत कशापाई फिरत असत्याय.
चौथा : अरे बाबानो, ह्या पुडाऱ्यांचं पेट्यात आन खोक्यात येव्हार चाललेले आसत्यात, कुटबी उड्या टाकोस्तोर टिकीट हातात आन त्यांच्याच घरच्यान्ला पुडं च्यान्स. आपल्याला कोन ईच्यारतोय? आपुन हित दिवस आन रात्र रक्ताचं पानी करत घर्रदार सोडून ह्येंचा परचार करत फिरत बसतो.
पहिला : आपल्याला तर आजपरेन कवा कुटं च्यान्स मिळाला न्हाय आन आसचं फ्री इनकमींग चालू ऱ्हायलं तर पुडंबी कवा मिळनार न्हाय ह्याची ग्यारंटी वाटायला लागलीय.
दुसरा : पन ह्याज्यावर पक्ष्याला काय उपाय काडता येत न्हाई का?
तिसरा : येतोय की, पन इच्छ्या पायजे ना. पुडारीबी आन पक्ष्यबी मतलबी हैत. आप्ली आप्ली सोय बगत्यात सगळेच जन.
चौथा : म्या तर म्हंतो आता आपुनचं ह्याज्यावर उपाय काडायला पायजे
तिघेही एका दमात : त्यो कंचा?
चौथा : आपन समद्या पक्ष्यातल्या कार्यकर्त्यांनी मिळून येक संगटना काडायची, त्येला नाव द्यायचं निष्टावान श्रमिक कार्यकर्ते संगटना
तिघेही : काडली संगटना, पुडं?
चौथा : पैली मागनी करायची, कंच्या बी पुडाऱ्याला पक्ष प्रवेश दिल्यावर त्या पुडाऱ्यानी कमीत कमी पाच वर्स पक्ष्याचं काम करायचं आन मगचं त्याला टिकीट द्यायंच का न्हाई हे ठरवन्यात यील.
तिघेही : आँ! लै झ्यॅक आयड्या रावं! तुमी तर टोटल इन्कमिंग आन औटगोईंगच बंद करायचा उपाय काडलात की राव. व्हॉटॅन आयड्या सर्जी! उद्याच चॅनलवाल्यांन्ला बोलवून घिवू आन आप्ली संगटना सुरू करुन टाकू. चियर्स!

मनसेची ब्लूप्रिंट


मनसेची बहुचर्चित ब्लूप्रिंट राज ठाकरेंनी अखेर सादर केली. त्याच दिवशी नेमके महाराष्ट्रात युती आणि आघाडींच्या फूटीचे राजकीय भूकंप झाल्यामुळे त्याच बातम्यांना अधिकाधिक कव्हरेज मिळाले. साहजिकच अनेंकांचे या ब्लूप्रिंटकडे दुर्लक्ष झाले. नियोजनपूर्वक जुळविलेले टायमिंग आयत्यावेळी चुकले असे म्हणायला हरकत नाही. तरी ज्या कुणाला मनसेची ही ब्ल्यू प्रिंट काय आहे आणि त्यात नेमके काय दडलेय याची उत्सुकता असेल,अशा जिज्ञासू लोकांना या ब्ल्यूप्रिंट विषयवार सर्व माहिती मराठीतून येथे तपशीलवार पहाता येईल.

संतशिरोमणी श्री नामदेव महाराजांचे चरणी विनम्र अभिवादन!





नाचू कीर्तनाचे रंगी 
ज्ञानदीप लाऊ जगी



असा भक्तिचा संदेश देत भागवत धर्माची पताका संपूर्ण भारतभर फडकविण्याचे अलौकिक कार्य करणाऱ्या संतशिरोमणी श्री नामदेव महाराजांची आज पुण्यतिथी. त्यानिमित्त संतशिरोमणी श्री नामदेव महाराजांचे चरणी विनम्र अभिवादन! 

पक्षनिष्ठ की सत्तानिष्ठ

पक्षनिष्ठ की सत्तानिष्ठ

सोळाव्या लोकसभेसाठी 2014 ची सार्वत्रिक निवडणूक एकदाची पार पडली. ही निवडणूक बऱ्याच कारणांनी सर्वांच्या लक्षात रहाणारी ठरली आहे.
निवडणूकीचा हा अंक संपला, आणि आता सुरू झाला आहे, तो आत्मपरिक्षणाचा आणि चिंतनाचा अंक. या अंकातील प्रसंग चांगलेच मनोरंजक होणार होतील. पराभवाचे खापर फोडण्यासाठी डोकी शोधली जातील. याच निमित्ताने आपल्या वैयक्तिक हेवेदाव्यांचा हिशोब चुकता करण्यासाठी एकमेकांवर आरोप केले जातील. राजीनाम्याच्या मागण्यांना जोर येईल. यांना हटवा, पक्ष वाचवा अशी नारेबाजी होईल. अशी नारेबाजी तर मतमोजणीच्या दिवशीच देशाच्या राजधानीत पहायला मिळाली सुध्दा. यातूनही भाटगिरी, चापलूसी, चमचेगिरी करणारे लाळघोटे तथाकथित पक्षनिष्ठ आपण पक्षाशी नव्हे तर, पक्षश्रेष्ठींशी किती एकनिष्ठ आहोत हे दाखविण्याचा अटोकाट प्रयत्न करतील.
आता खरा प्रश्न आहे तो त्या पक्षनिष्ठांचा, की ज्यांना सत्तेशिवाय जगण्याची सवय नाही. जसे जलबिन मछली तसे सत्तेशिवाय तडफडणारे हे पक्षनिष्ठ, सत्तेच्या प्रवाहापासून दूर फेकल्या गेलेल्या पक्षात राहून आपली पक्षनिष्ठा सिध्द करतील की, सत्तेत आलेल्या पक्षात प्रवेश करुन आपली निष्ठा सत्तेवरच आहे हे दाखवून देतील, हे आता येणारा काळच ठरवेल.

* * *

पॉलिटिका ई-पुस्तकावरील प्रतिक्रिया



पॉलिटिका ई-पुस्तकावरील प्रतिक्रिया
माझे ई-पुस्तक पॉलिटिका गुढीपाडवा दि.31.03.2014 या दिवशी प्रसिध्द झाल्यानंतर काही वाचकांनी त्यावर दिलेल्या प्रतिक्रिया येथे दिल्या आहेत. ज्या वाचकांनी प्रतिक्रिया दिल्या आहेत, त्यांचेही आभार आणि ज्या वाचकांनी दिलेल्या नाहीत त्यांचेही आभार. यापुढेही येणाऱ्या प्रतिक्रिया येथे अपडेट करण्याचा प्रयत्न केला जाईल.

Mon 07/04/2014 11:56 AM
Shri.Raman Karanjkaranche Politika he akadam mast pustak ahe.
Shri.Ramadas Futaney yanche zak janavale.
- JAYANT G ADKAR

¬¬¬¬

Tue 08/04/2014 09:46 AM
Dears,
Politika Charolyas are really fantastic!
Regards!
- Shripad J Lele
Associate Vice President  ( EHS,QS)

¬¬¬¬

Thu 10/04/2014 12:59 PM
Respected  Sir/Madam,
Thank you so much for sending this open-minded, realistic and practical email.
Such type of great mail could never get in my reading.
Once again thanks & best wishes from me.
Thanks & regards,
-Shahaji Jadhav,

¬¬¬¬

Thu 10/04/2014 04:44 PM
पॉलिटिका : *रमण कारंजकर* yanche pustak avadale.  Chalu ghadamodinche
darshan ghadale.
-
Anil Mohite

¬¬¬¬

Fri 11/04/2014 08:27 AM
Zakaaaaaaaaaaaaaaaaaaaaaassssssssssssss !!!!!!!!
With best regards,
- Shubhada Raje

¬¬¬¬

Fri 11/04/2014 09:50 AM
Dhanyavad
Politica …….

Vachayal dilyabaddal Kup Khup aabhari aahe………

If you have any books please send it to me on my below email id
Thanks & Regard's
- Anand Ranjane

¬¬¬¬

Sun 13/04/2014 05:37 PM
hi Raman...
khup mast..
pollitica madhle vatratika awdlya...
khas karun ti ashok chavan an rahul gandhi...
ithun pudhe j kahi lihishil ,te wachayla nakkich awdel mala...
asach lihit raha....
all d best...
- poonam p patil


¬¬¬¬

उत्सव लोकशाहीचा



उत्सव लोकशाहीचा
आधी जाणार मतदानाला
मगच लागणार कामाला
संकल्प मनाशी करुया
मतदानाचा हक्क बजवून
लोकशाहीचा उत्सव मनवूया
प्रचंड मतदान करुन
जिल्ह्याच्या नांवावर
नवा विक्रम घडवूया

ई-साहित्य प्रतिष्ठान : एक चळवळ



ई-साहित्य प्रतिष्ठान : एक चळवळ

मराठी भाषेतील साहित्यासाठी काही तरी केले पाहिजे या एका विचाराने झपाटलेली, आणि मराठी साहित्यावर प्रेम करणारी काही मंडळी सुमारे पाच वर्षापूर्वी एकत्र आली. मग सुरु झाले विचारमंथन, विचारांना दिशा मिळाली आणि त्यातूनच जन्म झाला एका चळवळीचा. आणि बघता बघता काही कालावधीतच त्या चळवळीने एका साहित्य यज्ञाचे स्वरुप धारण केले, त्या यज्ञाचं, त्या चळवळीचं नांव आहे ई-साहित्य प्रतिष्ठान.
छापील साहित्याच्या तुलनेत ई-साहित्य निर्मितीला येणारा अल्प खर्च, अनंतकाळचा टिकाऊपणा, वितरणासाठीचा अल्प खर्च, हव्या तश्या बहुरंगी सजावटीमुळे अधिक आकर्षकपणा आणि कमीत कमी वेळेत निर्मिती, याचसोबत कागद व शाईचा वापर नसल्यामुळे पर्यावरणचा समतोल राखण्यास अनुकूल अशी ई-साहित्य माध्यमाची जबरदस्त ताकद लक्षात घेऊन त्यांनी हेच माध्यम निवडले.
आणि या मंडळींनी ई-साहित्याच्या सेवेत स्वतःला झोकून दिले. अगदी निस्वार्थीपणे. यातून स्वतःला काही प्राप्ती व्हावी हा उद्देश तर अजिबातच नाही, तर मराठी साहित्यावर मनापासून प्रेम करणाऱ्या जगभरात विखुरलेल्या साहित्यप्रेमींना आपल्या माध्यमातून काही तरी चांगले साहित्य प्राप्त व्हावे. नवोदितांना प्रकाशन, वितरणांसाठी व्यासपीठ मिळावे, हाच या चळवळीच्या मागे उभा असलेला आणि या कार्यासाठी त्यांना निरंतर प्रेरणा देत रहाणारा उदात्त विचार.
नवोदित साहित्यीकांना प्रोत्साहन देऊन, त्यांचे साहित्य प्रकाशित करणे ते वितरीत करणे, नियतकालिके चालविणे, तसेच त्यांच्या संकेतस्थळांवर हे सर्व साहित्य सर्व मराठी साहित्यप्रेमी वाचकांना उपलब्ध करुन देणे यासारख्या कार्यातून ही चळवळ आज प्रगती करत आहे.
त्यांच्या ई-साहित्य प्रतिष्ठान या संकेतस्थळांवर त्यांनी आजवर प्रकाशित केलेली अडीचशेहून अधिक विविध विषयांवरील ई-पुस्तके, नियतकालिके असे सर्व ई-साहित्य डाऊनलोड करुन घेण्यासाठी सर्वांना उपलब्ध आहेत. आणि तेही अगदी विनामूल्य. साहित्य आणि वाचक यांच्यात कोणत्याही जाहिरांतींचासुध्दा अडथळा नाही, असा पारदर्शकपणा या संकेतस्थळावर पहायला मिळतो.
www.esahity.com

वितरणांसाठी आज या ई-साहित्य प्रतिष्ठानकडे सुमारे दीड लाख वाचकांचा ई-मेल आयडींचा डाटाबेस तयार आहे. आणि सर्व ई-साहित्य या लाखो वाचकांपर्यंत ई-मेलच्या माध्यमातून अतिशय जलदगतीने पोहोचविले जाते.
तेव्हा या चळवळीला प्रोत्साहन देण्यासाठी, आणि चांगले साहित्य वाचायला मिळण्यासाठी आपण सर्वांनी त्यांच्या संकेतस्थळाला एकदा भेट देऊन एक प्रसन्न अनुभव जरुर घ्यावा. येणारे नविन साहित्य मिळण्यासाठी आपला ई-मेल आयडी देऊन सभासद म्हणून नोंदणी करावी. 
बारा कोटी मराठी माणसांपैकी निदान एक टक्का म्हणजे किमान बारा लाख लोकांपर्यंत पोहोचण्याचा संकल्प उरी बाळगून ई-साहित्य प्रतिष्ठान उत्तुंग झेप घेण्यासाठी सज्ज आहे. त्यांच्या पाठीवर कौतुकाची थाप टाकून, त्यांच्या संकल्पाच्या पंखात बळ भरण्यासाठी, प्रत्येक मराठी वाचक सभासद नोंदणीच्या रुपाने आपले योगदान नक्कीच देतील अशी अपेक्षा आहे.

* * *

नळावरची भांडणे



नळावरची भांडणे
शिवीगाळ करत रोजच लफडी
बाहेर काढली जात असतात
सार्वजनिक नळावरची भांडणे आता
उमेदवारांचा प्रचार करत असतात

दिल्लीची किल्ली



दिल्लीची किल्ली
गल्लीतून दिल्लीत गेल्याची स्वप्ने
हल्ली रोजच पडायला लागली
पण सूज्ञ मतदारांच्या हाती दिसणारी
किल्ली बघून झोप ऊडायला लागली