आगळं! वेगळं !!!

अॅन्ड्रॉईड फोनवरील इंटरनेट वापरात बचत शक्य


मर्यादित वापर करुनही अॅन्ड्रॉईड फोनवरील इंटरनेट पॅक लवकर संपतो अशी बऱ्याच जणांनी तक्रार असते. त्यात काही प्रमाणात तथ्यही आहे. कारण जेव्हा आपण फोन इंटरनेटला कनेक्ट करतो, तेव्हा फोनमधील बरीचशी अॅल्पीकेशन्स आपल्या नजरेस न येता, आपल्या अपरोक्ष इंटरनेटचा वापर करुन त्यांच्या साईटला कनेक्ट होत असतात. आणि त्यांच्याकडून होत असलेल्या डाटा ट्रान्स्फरमुळे आपल्या वापरापेक्षा अधिक लवकर डाटा पॅक संपण्याचा अनुभव येणे शक्य आहे. कोणत्या अॅप्लीकेशन्सने किती डाटा वापरला आहे हे माय डाटा मॅनेजर सारख्या अॅपच्या माध्यमातून स्पष्टपणे दिसून येईल.

कोणत्या अॅप्लीकेशन्सना डाटा वापरण्याची परवानगी द्यायची व कोणत्या अॅप्लीकेशन्सना नाकारायची यावर जर नियंत्रण ठेवता आले तर इंटरनेटच्या डाटा वापरात काही प्रमाणात बचत करता येऊ शकेल. आता हे नियंत्रण कसे ठेवायचे, तर आपल्या अॅन्ड्रॉईड फोनवर फायरवॉल अॅप्लीकेशन इन्टॉल करुन नियंत्रण ठेवता येईल. गुगल प्ले वर बरीचशी फायरवॉल अॅप्लीकेशन्स मोफत उपलब्ध आहेत. पण त्यापैकी बहुतेक रुट केलेल्या अॅन्ड्रॉईड फोनवरच चालू शकणारी आहेत. त्यामुळे ज्यांनी फोन रुट केलेला असेल, त्यांना ती उपयुक्त ठरतील.



पण ज्यांचा फोन रुट केलेला नसेल, त्यांच्यासाठी No Root Firewall नावाचे एक अॅप्लीकेशन आहे ते उपयोगी ठरेल. याचा वापर केल्यास इंटरनेट कनेक्ट झाल्याबरोबर कोणती अॅप्लीकेशन्स इंटरनेटला कनेक्ट होऊ पाहात आहेत, व त्यांना परवानगी द्यायची की नाही हे या फायरवॉलमुळे ठरवता येते. आणि त्यामुळे आपल्या अपरोक्ष, आपल्या परवानगीशिवाय होत असलेल्या अनावश्यक इंटरनेट डाटा वापरांवर नियंत्रण ठेवून बचत करणे शक्य होते.

विशेषतः जे लोक केवळ व्हॉटसअॅप, फेसबुकच्या वापराकरीताच असलेले इंटरनेट पॅक वापरत असतील त्यांना याचा विशेष फायदा होईल.

गुगल अॅडसेन्स आता हिंदी भाषेसाठीही



गुगल अॅडसेन्समध्ये आता हिंदी भाषेसाठी अच्छे दिन आ गये है असं म्हणायला हरकत नाही. हिंदी भाषेतून ब्लॉग लिहणाऱ्या ब्लॉगर्सनी केलेल्या प्रयत्नांना (जर त्यांनी काही प्रयत्न केले असतील तर, कारण त्यांनी काय प्रयत्न केले, कधी केले, कुठे केले याबाबत माहिती उपलब्ध नाही) यश आले आणि गुगल अॅडसेन्स आता हिंदी भाषेसाठी उपलब्ध झाले आहे. गुगल लँग्वेज सपोर्ट या लिंकवर हिंदी भाषेचा समावेश केलेला पाहता येईल. 

आत्तापर्यंत जे हिंदी भाषिक ब्लॉगर्स पदरमोड करुन ब्लॉग लिहीत होते, किंवा त्यांना त्यासाठी उत्पन्नाचा स्त्रोत उपलब्ध नव्हता, त्यांना आता ही एक चांगली संधी उत्पन्न झाली आहे. 

पण यामुळे एक झाले की, आता हिंदी भाषिक ब्लॉगर्सना ब्लॉगद्वारे गुगल अॅडसेन्सच्या माध्यमातून अर्थार्जन करण्यासाठी अधिक परिश्रम घेऊन चांगले लिखाण करावे लागेल आणि त्याचसोबत ब्लॉगच्या ट्रॅफिकवरही लक्ष ठेवावे लागेल.  आता सर्वप्रथम कोणत्या हिंदी ब्लॉगला गुगल अॅडसेन्सच्या जाहिराती दाखविण्याचा मान मिळणार आहे हे पाहणे औत्सुक्याचे ठरेल. 

हिंदी भाषिक ब्लॉगर्सना याबद्दल शुभेच्छा देतानाच, मराठी भाषिक ब्लॉगर्सच्या मनात गुगल अॅडसेन्समध्ये आपल्या मराठीला अच्छे दिन कधी येतील असा विचार नक्कीच येत असेल.

व्हॉटसअॅप ग्रुपमधे पोस्ट केलेला मेसेज कोणी कोणी वाचला?



व्हॉटसअॅप वापरणारे जवळपास सर्वजण आपापल्या आवडीनुसार कोणत्या ना कोणत्या ग्रुपचे सदस्य असतात. आणि ते ग्रुपमधे आपलेही मेसेज पोस्ट करत असतात, पण त्यांनी पोस्ट केलेले मेसेज ग्रुपमधे कोणी वाचले की नाही हे मात्र समजत नाही.

पण आता व्हॉटसअॅप ग्रुपमधे तुम्ही जेव्हा काही मेसेज पाठवाल तेव्हा तो कोणी कोणी वाचला याची माहिती तुम्हाला मिळू शकेल. 

त्यासाठी तुम्ही ग्रुपमधे पाठविलेल्या मेसेजवर टच करुन तो मेसेज थोडासा दाबून ठेवा, त्यानंतर तुम्हाला स्क्रीनवरील पट्टीमधे i चे चिन्ह दिसेल त्यावर टच करताच तुमचा मेसेज कोणाकोणाला डिलीव्हर झाला आहे (Deliverd to), आणि तो कोणी कोणी वाचला आहे (Seen by) त्याचा तपशील दिसेल. 

त्याचबरोबर त्यामधील (Seen by) मधील कॉन्टॅक्टवर टच करुन Delivered व  Read चा टाईमसुध्दा तुम्ही पाहू शकाल.

सर्व ईमेल खात्यासाठी एकच अॅप


सध्याच्या काळात बहुतांश लोकांची जीमेल, याहू, आऊटलूक इत्यादी विविध सर्व्हिस प्रोव्हायडर्सची ईमेल अकाऊंटस् असतात. त्यांचा अॅन्ड्रॉईड स्मार्टफोनवर वापर करताना आत्तापर्यंत स्मार्टफोनधारकांना गुगलच्या ईमेल अकाऊंटसाठी Gmail आणि याहू, आऊटलूक यासारख्या इतर ईमेल्सच्या अकाऊंटसाठी Email अशा दोन स्वतंत्र अॅप्लीकेशन्सचा वापर करावा लागत होता.

पण अॅन्ड्रॉईड स्मार्टफोनधारकांची ही अडचण दूर करण्यासाठी गुगलने आता त्यांच्या Gmail या अॅप्लीकेशनमध्ये काही नविन सुविधा समाविष्ट केल्या आहेत. नविन सुविधा याप्रमाणे 




What's New
● All the features you love with a fresh new look and feel.
● One app for all your email. Check and send email from Yahoo Mail, Outlook.com and all other email accounts right from the Gmail app.
● Improved tablet layout that includes faster switching between inbox categories and accounts.
● Additional improvements if you're using Android Lollipop, like hiding sensitive lockscreen notifications.


या नविन सुविधे अंतर्गत सेटींग्ज मेनूमध्ये अॅड अकाऊंट या पर्यायावर क्लिक करताच  गुगल व पर्सनल (IMPA/POP) असे पर्याय समोर येतील. तुमचे गुगलवर एकापेक्षा अधिक अकाऊंटस् असतील तर पहिला गुगल हा पर्याय निवडून जीमेलचे आणखीन अकाऊंटस् अॅड करता येतील.



त्याव्यतिरिक्त तुमचे याहू, आऊटलूक, एओएल मेल अशी जी पर्सनल अकाऊंटस यात अॅड करायची असतील त्यासाठी दुसरा म्हणजे पर्सनल पर्याय निवडून तुम्हाला इतर ईमेल्सची अकाऊंट या जीमेल अॅप्लीकेशनमध्ये समाविष्ट करता येतील. 

गुगलने दिलेल्या या नविन सुविधेमुळे स्मार्टफोनधारकांना त्यांची गुगल, याहू, आउटलूक इत्यादी एकाहून अनेक ईमेल खाती Gmail या एकाच अॅप्लीकेशमधून वापरता येणे आता शक्य झाले आहे.

लाल दिव्यांची स्वप्ने



होय नाहीच्या गोंधळात
उरकला आहे एक टप्पा
चर्चेपुरत्याच उरल्या आहेत
आता नैतिकतेच्या गप्पा

इकडे सगळ्या चॅनेल्सवर
चर्चेवर चर्चा घडत आहेत
तिकडे मात्र प्रत्येकाला लाल
दिव्यांची स्वप्ने पडत आहेत

मराठी सचिनचे इंग्रजी आत्मकथन



सचिनच्या प्लेईंग इट माय वे या आत्मकथनाच्या इंग्रजी पुस्तकाचे काही भारतीय भाषांसोबत मराठीतही भाषांतर प्रकाशित करण्याचा निर्णय प्रकाशकांनी घेतला आहे.

एका दृष्टीने मराठी भाषिकांवर हा एक प्रकारे उपकारच झाला म्हणायचा. मराठी मातीत जन्मलेल्या, माय मराठी भाषा बोलत मोठा झालेल्या सचिनला आपले आत्मकथन लिहायला इंग्रजीचा आधार घेण्याची गरज का पडावी? विचार, आचार, बोलणे मराठीत पण आत्मकथन इंग्रजीत! इंग्रजी भाषेविषयी केवढं प्रेम!

ज्या महाराष्ट्रात तो वाढला, ज्या महाराष्ट्रात मराठी भाषेची अस्मिता जपण्यासाठी आंदोलने होतात, दुकानाच्या पाट्या इंग्रजीत लिहल्या तर त्यावर दगडफेक होते, त्या महाराष्ट्रात रहाणाऱ्या सचिनला आत्मकथन लिहताना मराठी भाषेचा विसर पडावा ही दुर्दैवाची गोष्ट आहे.

मराठी माणसांनी मोठे केलेला, मराठी क्रिकेटपटू म्हणून महाराष्ट्रातल्या लोकांनी डोक्यावर घेतलेला तो सेलिब्रेटी. त्याच्या या मराठी भाषेच्या दुराव्याविषयी त्याच्याविरोधात कोण बोलणार? कोण आंदोलन करणार? आणि ते होणारही नाही, कारण आंदोलनात, निदर्शनात केवळ सर्वसामान्यांना टार्गेट केले जाते, सचिनसारख्या सेलिब्रेटींना नाही, हे वेगळे सांगण्याची गरज नाही.

मराठी माणसाला अभिमान वाटेल अश्या सचिनसारख्या सेलिब्रेटीकडून मराठी भाषेची केली गेलेली ही उपेक्षा, मराठी भाषेवर प्रेम करणाऱ्यांना निश्चितच अपेक्षित नसणारी अशी आहे.

त्याचे आत्मकथन सर्वप्रथम मराठी भाषेत प्रसिध्द होऊन, नंतर त्याचे इतर भारतीय व परकीय भाषेत अनुवाद प्रसिध्द झाले असते तर मराठी माणसांना त्याचा अधिक अभिमान वाटला असता.

सचिनवर प्रेम करणारा क्रिकेटप्रेमी रसिक समाजाच्या विविध स्तरात आहे. सचिनच्या प्रत्येक गोष्टीचे कौतुक त्यांना असणे अगदी स्वाभाविक आहे. त्यामुळे सचिनने आत्मकथन लिहलयं म्हणल्यावर ते वाचण्याची इच्छा त्याच्या मराठी भाषिक चाहत्यांनाही झाली असणार, पण इंग्रजी भाषेच्या अडचणीमुळे त्यांचा हिरमोडही नक्कीच झाला असणार.

पण त्यांचा विचार सचिनने पुस्तक लिहताना केलेलाच नाही, चाहत्यांचाही नाही अन् मायमराठीचाही नाही. कोणता वाचकवर्ग डोळ्यासमोर ठेवून त्याने पुस्तक लिहले हे त्यालाच ठाऊक. शेवटी प्रकाशकांनाच मराठी माणसांची दया आली असावी (त्यांचा धंदा होणार हा भाग वेगळा), आता त्यांनी ही अडचण दूर करण्याचे ठरविले आहे.

आणि त्यामुळेच आता मराठी मनाचा मानबिंदू असलेल्या मराठी भाषिक सचिनने इंग्रजीतून लिहलेले आत्मकथन आता अनुवादित करुन पुन्हा मराठीत आणले जाणार आहेत. सचिनसारख्या मराठी माणसाने इंग्रजीतून हे पुस्तक लिहल्यामुळे करावा लागत असलेला हा महाद्रविडी प्राणायम! मराठी सेलिब्रेटींचे मराठी भाषेविषयीचे प्रेम किती हे यातून स्पष्ट व्हायला हरकत नाही.


एमआयएम पक्षावर बंदी घालावी का?


ओवेसीच्या एमआयएम पक्षावर बंदी घालावी का? ही मागणी सध्या मिडीयातून चर्चेत आहे. चिथावणीखोर, प्रक्षोभक व जातीयवाद भडकवणारी भाषणे ही या पक्ष्याची ओळख आहे. असे असूनही, या पक्षावर कडक कारवाई करण्याविषयीचे ठोस धोरण आजवर काँग्रेस व राष्ट्रवादी काँग्रेसने न स्विकारल्यामुळे, त्यांनीच अप्रत्यक्षपणे या पक्षाला खतपाणी घातल्याचे स्पष्ट होते. एमआयएमच्या भाषणामुळे मुस्लीम मते हिंदुत्ववादी पक्षांना मिळण्याऐवजी आपल्याला मिळतील असा हेतू त्यामागे असावा. पण तो हेतू सफल न होता, मुस्लीम मतदार काँग्रेस व राष्ट्रवादी काँग्रेस पक्षापासून दूरावला गेला, आणि त्यांची पारंपारिक मतेही थेट एमआयएम पक्षाकडे गेली.

त्यामुळे काँग्रेस व राष्ट्रवादी काँग्रेसला आता तो पक्ष जातियवादी आहे याचा साक्षात्कार झाला, आणि त्यातून ही मागणी पुढे आली असावी. राज ठाकरे, प्रवीण तोगडीया यांच्यासारख्या नेत्यांना प्रवेशबंदी, भाषणबंदी किंवा काय भाषण करावे व करु नये याविषयी बंधने घातली जातात हे आपण आजपर्यंत पहात आहोत, मात्र ओवेसींना यासारखे कायदे नियम लागू केले जात नाहीत. मुस्लीमांचे लांगूलचालन म्हणजे धर्मनिरपेक्षता अशी काँग्रेस व राष्ट्रवादी काँग्रेसच्या मते धर्मनिरपेक्षतेची व्याख्या असावी.

याचसोबत हिंदूत्ववादी संघटनाही डावपेचात कमी पडत आहेत असे दिसते. याचे कारण असे की, राज ठाकरे, प्रविण तोगडीया इत्यादी नेत्यांवर देशाच्या विविध प्रांतात स्थानिक पोलीस स्टेशनमध्ये, कोर्टामध्ये तक्रारी, गुन्हे, दावे दाखल केले जातात त्यामागे पध्दतशीरपणे डावपेच आखले गेलेले असतात. देशाच्या विविध भागात कोर्टकचेऱ्यांच्या चकरा मारुन या नेत्यांना कसे जेरीस आणता येईल हा हेतू त्यामागे असतो. असे डावपेच आखण्याच्या कौशल्यचा अभाव हिंदूत्ववादी संघटनामध्ये दिसून येतो.

निवडणूका म्हणजे ...



निवडणूका म्हणजे ...



पक्षात सन्मानाने वागविले
जात नसल्याचा अचानकपणे
साक्षात्कार होण्याचा,
निवडणूकांची संधी साधत
पक्षांतर करण्याचा काळ

विरोधकांनी दिशाभूल केली
हे पटवून देण्याचा प्रयत्न
करत विकासाच्या आठवणीने
गळे काढण्याचा काळ

एकाला हात, तर दुसऱ्याला
लाथ देत गरळ ओकण्याचा,
मुखवटे फाडण्याचा काळ

आपण कधी काळी केलेली
कोणतीतरी कामे आठवून
आठवून सांगण्याचा काळ

पूर्तता करण्याची बंधने
नसलेल्या आश्वासनांची खैरात
जाहिरनाम्यातून करण्याचा काळ

पदयात्रेतून उसने हसू चेहऱ्यावर आणत
नको तिथे पायी चालण्याचा,
ज्यांच्याकडे वाहनांच्या काचेतूनही
बघायला कधीच सवड नाही
अशांचे पाय धरण्याचा काळ

मतांसाठी अपमान गिळण्याचा,
स्वाभिमान गहाण टाकण्याचा,
लाचारी पत्करण्याचा काळ

शत्रूत्व, मित्रत्व आणि
आत्मसन्मानांच्या व्याख्या
बदलण्याचा काळ

कार्यकर्ते, मिडीया, ज्योतिषी,
सर्वेक्षण संस्थांच्या तेजीचा,
सट्टेबाजांच्या चिंतेचा, म्हणजेच
कुणाचा धंदा, तर कुणाचा
वांधा होण्याचा काळ

आणि फक्त मतदान केंद्रात
जाईपर्यंतच मतदार राजाचा
मान मिळण्याचा काळ

हा महाराष्ट्र माझा!

=> युती तोडणाऱ्यांना भांडी घासायला लाऊ -संजय राऊत

  • म्हणजे पुन्हा भांड्याला भांडे लागणारच

=> मोदींनी केंद्राचे पहावे, महाराष्ट्राचे आम्ही बघून घेऊ -राज ठाकरे

  • आम्ही एकदा वाटणी केली म्हणजे केली, मतदार मंडळी तेल लावीत गेली

=> फक्त खर्च वाढला, सिंचन झालेच नाही -पृथ्वीराज चव्हाण

  • खर्चात पुढे आहे, हा महाराष्ट्र माझा!

=> रिकामे जहाज जास्तच गोंगाट करते, सोनिया गांधींची मोंदीवर टीका

  • टीका की काँग्रेसच्या जहाजाची तक्रार?

व्हॉटॅन आयड्या सर्जी!


स्थळ : बारमधला एक निवांत कोपरा
वेळ : निवडणूकीतल्या रात्रीची
चार-पाच विविध पक्षांचे कार्यकर्ते बारमध्ये एकाच टेबलवर बसून घोटासह चकण्याचा मजा घेत गप्पा मारण्यात मग्न.
पहिला : काय बी म्हना राव, पन ह्या येळला आपलं तर डोस्कचं चालना झालयं.
दुसरा : कशामुळं?
तिसरा : आरं कशामुळं म्हून काय इच्यारतोय, कोन्ता पुडारी कुटं हाय तेच कळना झालय.
चौथा :  खराय, काल हिकडं, आज तिकडं, तुम्चा आम्च्याकडं आन आम्चा तुमच्याकडं आस्लचं चाललय.
पहिला : म्हागच्या ईलेक्षनला ज्याच्या इरुध्द परचार केला, आता त्याज्याच बाजून करायची पाळी आलीय
दुसरा : आन त्या पुडाऱ्यांन्ला बी गोंदळल्या सारकं व्हत आसल, म्हंजी उगं पळत्या लोकलचा डबा पकडून गर्दीत घुसल्यासारकं वाटत आसल. जितं गेलेत तितल्या कुनाचीबी वळक ना पाळक.
तिसरा : म्हंजी मान ना मान मै तेरा म्हेमान म्हना की.
चौथा : बरोबर बोल्लात राव, आस्लं इनकमिंग चाल्लयं की आपन येकाद्याला मोबाईलवर इच्यारतो का न्हाई तुमी कुटं हैत म्हनून , तसं आता या उड्या टाकू पुडाऱ्यांन्ला तुमी आत्ता कुटं हैत आसं इच्यारायची पाळी आलीय.
पहिला : ह्या पुडाऱ्यांचं कसबी चालतय, पन आप्ल्यासारक्या कार्यकर्त्यांचं काय
दुसरा : आपन हैतच सतरंज्या उचलायला
तिसरा : हं आत्ता लक्ष्यात आलं, तरीच मी ईच्यार करतं हुतो की, आमचं रौल जी न्हेमीच तरुनांनी राजकार्नात यावं म्हनून आवतनं देत कशापाई फिरत असत्याय.
चौथा : अरे बाबानो, ह्या पुडाऱ्यांचं पेट्यात आन खोक्यात येव्हार चाललेले आसत्यात, कुटबी उड्या टाकोस्तोर टिकीट हातात आन त्यांच्याच घरच्यान्ला पुडं च्यान्स. आपल्याला कोन ईच्यारतोय? आपुन हित दिवस आन रात्र रक्ताचं पानी करत घर्रदार सोडून ह्येंचा परचार करत फिरत बसतो.
पहिला : आपल्याला तर आजपरेन कवा कुटं च्यान्स मिळाला न्हाय आन आसचं फ्री इनकमींग चालू ऱ्हायलं तर पुडंबी कवा मिळनार न्हाय ह्याची ग्यारंटी वाटायला लागलीय.
दुसरा : पन ह्याज्यावर पक्ष्याला काय उपाय काडता येत न्हाई का?
तिसरा : येतोय की, पन इच्छ्या पायजे ना. पुडारीबी आन पक्ष्यबी मतलबी हैत. आप्ली आप्ली सोय बगत्यात सगळेच जन.
चौथा : म्या तर म्हंतो आता आपुनचं ह्याज्यावर उपाय काडायला पायजे
तिघेही एका दमात : त्यो कंचा?
चौथा : आपन समद्या पक्ष्यातल्या कार्यकर्त्यांनी मिळून येक संगटना काडायची, त्येला नाव द्यायचं निष्टावान श्रमिक कार्यकर्ते संगटना
तिघेही : काडली संगटना, पुडं?
चौथा : पैली मागनी करायची, कंच्या बी पुडाऱ्याला पक्ष प्रवेश दिल्यावर त्या पुडाऱ्यानी कमीत कमी पाच वर्स पक्ष्याचं काम करायचं आन मगचं त्याला टिकीट द्यायंच का न्हाई हे ठरवन्यात यील.
तिघेही : आँ! लै झ्यॅक आयड्या रावं! तुमी तर टोटल इन्कमिंग आन औटगोईंगच बंद करायचा उपाय काडलात की राव. व्हॉटॅन आयड्या सर्जी! उद्याच चॅनलवाल्यांन्ला बोलवून घिवू आन आप्ली संगटना सुरू करुन टाकू. चियर्स!

मनसेची ब्लूप्रिंट


मनसेची बहुचर्चित ब्लूप्रिंट राज ठाकरेंनी अखेर सादर केली. त्याच दिवशी नेमके महाराष्ट्रात युती आणि आघाडींच्या फूटीचे राजकीय भूकंप झाल्यामुळे त्याच बातम्यांना अधिकाधिक कव्हरेज मिळाले. साहजिकच अनेंकांचे या ब्लूप्रिंटकडे दुर्लक्ष झाले. नियोजनपूर्वक जुळविलेले टायमिंग आयत्यावेळी चुकले असे म्हणायला हरकत नाही. तरी ज्या कुणाला मनसेची ही ब्ल्यू प्रिंट काय आहे आणि त्यात नेमके काय दडलेय याची उत्सुकता असेल,अशा जिज्ञासू लोकांना या ब्ल्यूप्रिंट विषयवार सर्व माहिती मराठीतून येथे तपशीलवार पहाता येईल.